Нийслэлийн нийгмийн салбарын агентлаг, харьяа байгууллагуудын удирдах албан тушаалтнуудын шуурхай хурлыг “Хүүхэд залуучуудын сургалт хүмүүжлийн тусгай цогцолбор”-ын байранд 2022 оны 10 дугаар сарын 07-ны өдөр зохион байгууллаа. Хуралдаанаар тус байгууллагын хамт олны хийж буй ажилтай танилцаж, тулгамдсан асуудлуудыг сонсож, хамтран шийдвэрлэж маш үр дүнтэй нэг өдрийг өнгөрөөв. Уг хуралд Улаанбаатар хотын музейн захирал П.Даваасүрэн оролцлоо.
Хурлын тухайд Нийслэлийн Засаг даргын нийгмийн салбар, ногоон хөгжил болон агаар, орчны бохирдлын асуудал хариуцсан орлогч З.Төмөртөмөө “Бидний асуудал нэг учир цаашид салбар хоорондын уялдааг илүү ханган, ойр ажиллах шаардлагатай байна. Иймд энэ хурлыг тогтмолжуулж, заавал хөрөнгө санхүү гэхгүйгээр байгууллагууд өөрсдийн нөөц боломж, дотоод баазыг ашиглан хамтран ажиллах нь ажлын урсгал, хамтын ажиллагааг сайжруулах үр дүнтэй гэж харж байна” хэмээн онцлов.
Дашрамд дурьдхад Нийслэлийн Засаг даргын дэргэдэх “Хүүхэд залуучуудын сургалт хүмүүжлийн тусгай цогцолбор” нь нийслэлийн хэмжээнд эцэг эхийн хараа хяналтаас гарч хүнд нөхцөлд амьдардаг хүүхэд залуусыг амьдрах, суралцах нөхцөл боломжоор ханган, улмаар мэргэжил олгох үйл ажиллагаа явуулдаг, 24 цагийн үйлчилгээтэй нийслэлийн төсөвт асрамж халамжийн байгууллага юм. Одоогоор тус цогцолборт 130 орчим гаруй хүүхэд залуус нийгэм, сэтгэл зүйн үйлчилгээ авч байна.
