Нийслэл Улаанбаатар хот үүсгэн байгуулагдсаны 385 жилийн ойн хүрээнд “Улаанбаатар хот-100” архивын баримт, биет үзмэрийн үзэсгэлэн 2024 оны 10 дугаар сарын 23-ны өдөр Монголын Үндэсний музейд нээлтээ хийлээ.

Үзэсгэлэнд Монголын Үндэсний музей, Нийслэлийн архивын газар, Улаанбаатар хотын музейд хадгалагдаж буй Улаанбаатар хотын түүхэнд холбогдох архивын баримт, биет үзмэрүүдийг дэлгэн үзүүллээ.

Үзэсгэлэнг нээж Нийслэлийн Засаг даргын нийгмийн салбар, ногоон хөгжил болон агаар, орчны бохирдлын асуудал хариуцсан орлогч А.Амартүвшин үг хэлж, МҮМ-н захирал Г.Энхбат, Нийслэлийн Архивын газрын дарга Н.Туул, НСУГ-ын Соёл, соёлын өвийн хэлтсийн дарга Г.Жанцансамбуу, Улаанбаатар хотын музейн захирал П.Даваасүрэн, АЕГ-ын Эрдэм шинжилгээний ажилтан Г.Дашням зэрэг албаны хүмүүс оролцлоо. Нээлтийн үеэр Улаанбаатар театрын уран бүтээлчид ая дуугаа өргөлөө.

Улаанбаатар хотын музейн Эрдэм шинжилгээний ажилтан Г.Очбаяр үзэгчдэд хотын түүхийн талаар тайлбараар үйлчиллээ.

Улаанбаатар хотын музейгээс нийслэл хотын түүхэнд холбогдох түүхэн ховор 20 үзмэр тавигдлаа.

Нэр дурдвал: Хотын захиргааны анхны бичгийн машин, Хотын намын хороо байгуулах тухай бичиг, Улаанбаатар хотын захиргааны дагаж явах дүрэм, Хотын намын хорооны анхны тамганы дардас, Улаанбаатар хотын захиргааны тамга, “Мэлхий хөшөө” загвар, Хотын намын хороо байгуулагдсан нь – уран зураг гэх мэт..

Үзэсгэлэн 10 дугаар сарын 30 хүртэл ажиллана.

Үзэгч та бүхэн Үндэсний музейд зочлон ирж их хотынхоо түүхтэй танилцана уу.