УЛААНБААТАР ХОТЫН МУЗЕЙ

Нийслэлийн аялал жуулчлалын газраас  Улаанбаатар хотод 2015 онд зохиогдох аялал жуулчлал, соёл урлаг, спортын арга хэмжээний хуанлиг гаргасан байна.

Улаанбаатар хотод 2015 онд зохиогдох аялал жуулчлал, соёл урлаг, спортын арга хэмжээний хуанли

2015 онд зохиогдох шашин, соёлын арга хэмжээ

Аялал жуучлалын мэдээлэл, сурталчилгааны төв

Лавлах утас: 7010-8687

Цахим хуудас: tourism.ub.gov.mn

Дилав хутагт Б.Жамсранжавын лагшин мэндэлж, мэлмий гийсэн 131 жилийн ойн өдөр (2014.10.08)

Монголын 12 хутагтын нэг Дилав Хутагт Жамсранжав нь монгол хүн бүрийн бахархал болсон хүн юм. Гэвч ороо бусгаа цагийн аясаар “ЭХ ОРОНЧ “-ийн маань алдар нэр, гавъяа зүтгэл улам бүдгэрсээр байна. Тиймээс жил бүрийн 10-р сарын 8-нд Дилав Хутагт Жамсранжавын үйл хэргийг олон нийтэд таниулах, буяны ном хурах үйл ажиллагааг уламжлал болгон зохион байгуулж байгаа билээ. Энэ жил “Мамба дацан” хийдэд буяны ном хуруулж, “Улаанбаатар хотын музей”-д Дилав Хутагт Жамсранжавын амьдрал, үйл хэрэгтэй холбоотой гэрэл зургийн үзэсгэлэнг зохион байгуулж байна.

Улаанбаатар хотын музейд Дилав хутагт Б.Жамсранжавын үзэсгэлэн

Хугацаа: 2014.10.08-2014.10.14

Зохион байгуулагч байгууллага:

• “АРИГҮМедиа” ХХК
• “Дилав Хутагт Жамсранжав нийгэмлэг” ТББ
• “Улаанбаатар хотын музей”

Дилав хутагт Жамсранжавын цадиг оршвой

Ар халхын 84 шидтэний нэг хэмээн алдаршсан Дилав хутагтын хувилгаан Б.Жамсранжав XV жарны хөх бичин жилийн намрын дунд сарын 15 буюу аргын тооллын 1883 оны 10-р сарын 08-нд тэр үеийн Халхын Засагт хан аймгийн Хотгойдын Цогтой вангийн хошуу, одоогийн Завхан аймгийн Түдэвтэй сумын Ойгон нуур багийн нутаг Ойгон нуурын ар бие Баян айраг уулын энгэр Түшлэгийн булаг гэдэг газар Баашлуугийн 3-р хүү болон мэндэлжээ. Тэрээр Дэмчиг бурханы бүрэлбаа, Дилав хутагтын хувилсан дүр мөн хэмээн тодорч одоогийн Завхан аймгийн Шилүүстэй сумын нутагт оршиж байсан Норванчин хийдэд шавилан суусан байна. 5 настайдаа банди, 7 настайдаа равжун, 21 насандаа гэцэл, 25 насандаа цорж, 29 насандаа самади багш цол тус тус хүртжээ. Тэрээр Ховдын хязгаарын Шар сүмийг тэргүүлж байв. 1923 оноос Улиастайн сайдаар ажиллаж байгаад 1932 оноос Дотоодыг хамгаалах газрын даалгавараар Хятад руу тагнуулын ажлаар гарч улмаар Чан Кай Ши-гийн дэргэд ажиллах болжээ. Тэрээр “Дэслэгч Жамсран” нэрээр тагнуулын мэдээ явуулж байсан нь өдгөө тагнуулын ерөнхий газрын архивт хадгалагдаж байна. Гэвч зүдэг хар цагийн эрхээр тэрээр буруутгагдаж, хувьсгалын эсэргүү нэр зүүн хэлмэгдсэн байна. Дилав хутагт Б.Жамсранжав Хятадын ерөнхийлөгч Чай Кай Ши-гийн дэргэд 6 жил зөвлөх хийхдээ 1946 онд Монгол улсын тусгаар тогтнолыг хүлээн зөвшөөрүүлсэн түүхэн гавъяатай. Хилс хэрэгт буруутгагдсан тэрээр нутагтаа эргэн ирэхийг оролдсон ч тухай бүр бүтэлгүйтэж байсан учир өөрийн найз, АНУ-ын монголч эрдэмтэн О.Латтиморын санаачлагаар АНУ-ын Нью-Йорк хотын Нью Жерсид амьдрах болсон байна. Нью Жерсид амьдрах хугацаандаа тэрээр АНУ-д амьдарч буй Халимаг иргэдийг цуглуулан оюун санааны хувьд удирдан чиглүүлж, анхны буддын сумыг байгуулалцаж байв. 1961 онд Монгол улс НҮБ-д элсэхэд түүний оруулсан хувь нэмэр тун их юм. 1964 онд Монгол улс АНУ-д элчин сайдын яамаа нээхэд тэрээр бараг орой бүр тэнд ирж хашаан дотор тоглож буй монгол хүүхдүүдийг харан нулимс дуслуулж суусан гэдэг. Цагийн эрхээр буруугүй буруутан болж нутагтаа эргэн очих эрхгүй болж хэлмэгдсэн түүний зүрх монголын төлөө цохилсоор 1965 оны 04-р сарын 08-ны өдөр 82 насандаа жанч халсан байна. Түүний ээдрээтэй амьдралын түүх эргэх цагийн аясад улам бүр тодорсоор байна.

Холбоо барих: 976-88117805, 976-99851211,95864824 Цахим хаяг:burmaa@arigumedia.mn

Цахим ертөнцөөр учран золгож буй Та бүхэнд өнөөгийн Улаанбаатар хотыг Монгол улсын нийслэлээр тунхагласны 102 жилийн өдрийн мэнд хүргэе.

Олноо Өргөгдсөний тэргүүн оны өвлийн сүүл сарын хоринд буюу 1912 оны хоёрдугаар сарын 7-ны өдөр Дотоод Хэргийг Бүгд Захиран Шийтгэгч яамнаас Их хүрээг Нийслэл хүрээ хэмээн бичиж явбаас нийлэлцэх, үл нийлэлцэхийг айлтгасан айлтгалыг Богд хаанд өргөн барихад Зарлиг гуйсан ёсоор болгогтун хэмээжээ. Ийнхүү өдгөөгөөс 102 жилийн тэртээ монгол төрийн гал голомт Их хүрээ нь VIII Богд Жавзундамба хутагтын зарлигаар Нийслэл хүрээ хэмээх нэрийг авч, Олноо Өргөгдсөн Богд хаант Монгол Улсын Нийслэлээр тунхаглагдсан түүхтэй.

Чухам энэ өдрийг тохиолдуулан Улаанбаатар хотын түүхийг сонирхогч Та бүхэнд зориулан “Сайн байна уу Улаанбаатар минь” фэйсбүүк хуудсыг Улаанбаатар хотын музейгээс санаачлан нээж байна.

Энэхүү хуудсаар дамжуулан Улаанбаатар хотын түүхийн мэдлэг, мэдээллийг авах төдийгүй хотын эрт, эдүгээгийн аж байдал, ахуй амьдралыг илэрхийлэх эд өлгийн дурсгалыг олж илрүүлэхэд та бүхэн бидэнтэй хамтран ажиллана гэдэгт итгэлтэй байна.

https://www.facebook.com/HelloUlaanbaatar

Улаанбаатар хотын музейн ажилчид, албан хаагчид 2014.01.18-ны Бямба гарагт бүх нийтийн цэвэрлэгээ хийж, ойр орчныхоо талбай, явган хүний замыг цэвэрлэлээ.

Ц.Батзориг агсны ” ХҮМҮҮС ” гэрэл зургийн,

Д.Баяржаргалын 1893-1993 оны зургийн аппаратны цуглуулгын

үзэсгэлэн 2014 оны 1-р сарын14–ны 12 цагаас Улаанбаатар хотын музейд нээгдлээ.

Цэгмидийн БАТЗОРИГ (1966-2001) 1986-1992 онд ЗХУ-ын Ленинград хотноо улсын их сургуулийн сэтгүүлчийн ангид фото сурвалжлагчийн мэргэжил эзэмшжээ. 1992-1996 онд МОНЦАМЭ агентлагт гэрэл зургийн сурвалжлагчаар ажиллаж байгаад , 1996 оноос  гэрэл зургийн мэдээлэл, сурталчилгааны “ГАММА” агентлагийг хэсэг нөхдийн хамт байгуулсан.

Ц.Батзориг 2001 оны 1 дүгээр сарын 14-нд баруун аймгуудад болсон байгалийн гамшиг, цас зудны тухай гэрэл зургийн сурвалжлага хийхээр албан үүргээ гүйцэтгэж яваад нисдэг тэрэгний ослоор харамсалтайгаар амь үрэгдсэн билээ.

Тэрээр уран бүтээлийн бие даасан “Хүмүүс” үзэсгэлэнг 1998 онд Улаанбаатар хотод гаргасан. Энд толилуулж буй зургууд энэ үзэсгэлэнгийн ажлын зургууд юм.

Ажлын гэдэг нь үзэсгэлэнд тавигдах зургийг урьдчилан буулгаж сонголт хийдэг, зургаа  хэрхэн томруулах  төлөвлөгөө хийдэг зургууд юм.

Мэргэжлийн гэрэл зурагчдыг дэмжих, гэрэл зураг сонирхогчдыг олшруулах зорилгоор  2001-2011 онуудад  Ц.Батзоригийн нэрэмжит оны шилдэг гэрэл зураг шалгаруулах уралдаан, үзэсгэлэнг зохион байгуулж байсан билээ.

Өнөөдөр Монголд гэрэл зураг сонирхдог, цаашид ажил мэргэжлээ болгох, улам ихийг сурч мэдэх хүсэл мөрөөдөлтэй олон зуун  залуус бий болсон байна.

Тэдэнд зориулан Монголчуудын тухай, монгол хүмүүний амьдралын дүр төрхийг гэрэл зургийн урлаг, гэрэл зургийн хэлээр харуулах Ц.Батзоригийн дөчин таван    бүтээлийг дэлгэн үзүүлж байна.

Түүний сэтгэл зүрх нь юунд шаналж, дуран нь хаашаа чиглэж, юуны тухай өгүүлж байсныг харуулах эдгээр зургуудыг үзсэн хэн боловч Батзоригийн тухай, уран бүтээлийнх нь тухай, гэрэл зургийн урлагийн тухай шинэ бодол тээн үлдэнэ гэдэгт найдна.

Гэрэл зураг үүсээд 170 гаруй жил болж байна. Энэ цаг үеэс л фото аппаратны цуглуулга эхэлсэн буй за.

Харин монголчууд гэрэл зурагтай учраад 130 гаруй жил болжээ. Монголын тухай анхны гэрэл зургуудыг оросын судлаач Адрианов хэмээх хүн 1877 оны орчим авч мөнөөх зургуудаараа эзэн хааныхаа шинжлэх ухааны академийн шагнал мөнгөн медаль хүртэж байжээ. Харин энэ зургуудыг тэр үед ямар аппаратаар хэрхэн  яаж авсан бол гэх мэт олон асуулт урган гарах нь зайлшгүй юм. Аливаа цуглуулга өөрөө олон мянган асуулт, тайлагдаагүй нууц түүх агуулж байдаг.

Түүхэн агшинг ганц товчоор баримт түүх болгон үлдээх фото аппарат нь  тухайн он цагийнхаа техник технологийн хөгжил дэвшил, дизайны цогц шийдэл ул мөр болж үлддэг билээ. Фото аппарат үйлдвэрлэсэн орныхоо эдийн засгийн хөгжил дэвшлийг илэрхийлэхээр барахгүй, цаг хугацаа, орон зайны хаалтыг үгүй болгодог ид шидтэй хайрцаг бөлгөө.

Дэлхийн хорь гаруй орны 500 гаруй компани фирм фото аппарат үйлдвэрлэх буянтай ажлыг эрхэлж байжээ. Дэлхийн 2-р дайны өмнө герман, америкууд фото аппаратын зах зээлд тэргүүлж байсан беол дайны дараагаас япончууд хүч түрэх болсон байна. Цуглуулагчид фото аппаратыг хэрэглээ болон төрөл зүйл, үйлдвэрлэсэн орон зэргээр нь ангилан цуглуулах болжээ.

Улаанбаатар хотын музейд Д.Баяржаргалын цуглуулсан 1893-1993 оны хооронд бүтээгдсэн 50 орчим гэрэл зургийн аппаратыг дээжлэн сонгож тавьжээ.  Д.Баяржаргал бол эцгийнхээ цуглуулгыг үргэлжлүүлж буй хоёр дахь үеийн цуглуулагч юм. Түүний эцэг СССР буюу хуучин ЗХУ-ын үед гарсан бараг бүх аппаратыг цуглуулсан бол хүү нь энэ цаг үеийг урагшлуулж, хамрах хүрээг өргөтгөсөн юм. Үүний нэг жишээ болгон 1890-ээд оны сүүлээс эхлэн АНУ-д  үйлдвэрлэсэн КОДАК аппаратын хөгжил дэвшлийг эндээс харж болно.

Байгууллагын нээлттэй байдлыг хангах,  иргэдэд төрийн үйлчилгээ үзүүлэх чиглэлээр авсан арга хэмжээ, үр дүн

2013 онд музейгээс иргэдийг соён гэгээрүүлэх, мэдлэг боловсролыг дээшлүүлэх чиглэлээр дараах ажлуудыг зохион байгуулав. Үүнд:

Музейн сан хөмрөгийн Улсын тооллогыг амжилттай зохион байгуулж дуусав.

Монгол Улсын Боловсрол, Соёл, Шинжлэх ухааны сайдын 2012 оны 74 дүгээр тушаалыг үндэслэн Нийслэлийн Засаг Даргын 2012 оны А/506 дугаар захирамжаар батлагдсан Улаанбаатар хотын музейн сан хөмрөгийн улсын тооллогын салбар комиссын бүрэлдэхүүн 2012оны 8 дугаар сарын 20-ны өдрөөс 11 дүгээр сарын 25-ны хооронд сан хөмрөгийн улсын тооллого явуулж дуусав.

2012-2013 оны сан хөмрөгийн улсын тооллогоор 1110UBM0001, 1110UBM0002, 1110UBM0003 хувийн дугаартай ерөнхий бүртгэлд 746 дэсийн дугаартай 3340 тоо ширхэг, 3521 иж бүрдэл бүхий үзмэр, эд өлгийн зүйл тоологдон бүртгэгдсэнээс Үндсэн сан хөмрөгийн бүртгэлд 279 дэсийн 798 ширхэг, 961 иж бүрдэл бүхий үзмэр, эд өлгийн зүйл, Туслах сан хөмрөгийн бүртгэлд 467 дэсийн 2542 ширхэг, 2560 иж бүрдэл бүхий үзмэр, эд өлгийн зүйл тоологдон бүртгэгдээд байна.

УЛААНБААТАР – Энх цагийн бүтээн байгуулалт

гэрэл зургийн үзэсгэлэн (2013.10.24-11.15)

Дэлхий II дайн дууссаны дараа Улаанбаатар хот энх цагийн бүтээн байгуулалтад шилжив. Хүн төрөлхтөнд асар их гай гамшиг авчирсан дэлхийн дайн дууссан нь хотын хөдөлмөрчдөд төрөлх хотоо жинхэнэ ёсоор шинэчлэн байгуулж хөгжүүлэх сайхан боломжийг нээв.

1946 онд Улаанбаатар хотын төвийн хэсгийг шинэчлэн байгуулах урьдчилсан ерөнхий төлөвлөгөө СнЗ-ийн 47-р хуралдаанаар батлагдаж, энэ төлөвлөгөөнд хотын төв ба хөдөлгөөн ихтэй гол гудамжуудыг 24-30 метр өргөн, ердийн гудамжуудыг 15-22 метр өргөн байхаар бодож барилгажуулах, хотын төв хэсэгт барих барилгыг хоёроос дээш давхар байхаар бодож, ийм барилгуудыг төвийн хэсэгт нягтруулан барих, хотыг ногооруулах, цэцэрлэгжүүлэх ажлыг баруун тийш Холбооны яам (одоогийн Төв шуудан) хүртэл үргэлжлүүлэх, Их сургуулийн гудамж ба бусад гудамжинд мод тарих зэрэг ажлыг хийж гүйцэтгэхийг заажээ.

Энх цагийн бүтээн байгуулалтын ажлын дагуу 1945-1950-иад онд Улаанбаатар хотын төв Д.Сүхбаатарын талбайн зүүн хойно МУИС-ийн барилга, түүний баруун талд 72 айлын сууц, талбайн зүүн хэсэгт Улсын төв театрын барилга, түүнээс урагш Гадаад яамны байшин, Төв поликлиник, арай зүүхнээр 1-р амаржих газар, төв талбайн баруун өмнө хэсэгт Улсын нийтийн номын сан, баруун талд Элдэв-Очирын нэрэмжит кино театр (одоогийн Хөрөнгийн бирж), Алтай зочид буудал (одоогийн Нийслэлийн Засаг даргын тамгын газар), хоймор талд нь Засгийн газрын ордны барилгыг барив. Улаанбаатар хотын төвийн хэсгийн анхны эдгээр барилгыг барьж байгуулахад олзлогдсон япон цэргүүдийг оролцуулж нэлээд ажлыг хийжээ. Мөн энэхүү бүтээн байгуулалтад монгол улсын барилгын цэрэг оролцож, Засгийн газрын 50 дугаар байр (одоогийн Их тэнгэрийн цогцолбор), Сүхбаатарын нэрэмжит офицерын сургууль (одоогийн ХААИС), Мах комбинат, Хивсний үйлдвэр, Савангийн үйлдвэр, Гутлын үйлдвэр  гэх зэрэг олон арван байгууламжийг барьж, хувь нэмэр оруулжээ.

Мөн Д.Сүхбаатарын нэрэмжит талбайг цардмал хучилттай болгож, төв дунд Д.Сүхбаатарын хөшөөг байгуулав. Үүгээр өнөөгийн Улаанбаатар хотын төвийн хэсгийн ерөнхий төрх бүрэлдэн бий болжээ. Дээрх хугацаанд Мах комбинатын барилгыг барьж, үйлдвэрийг ашиглалт оруулснаас гадна 8-16 айлын сууц, Төв Хорооны 23 айлын сууц, 30 дугаар барилга, Намын шинэ хүчний дээд сургууль, Пивоны завод, Модны заводын өргөтгөл, 8-р хорооны бага сургууль, Шинэ хүчний дээд сургуулийн клуб, гуанз, комбинатын ажилчдын клуб, Төмрийн заводын ажилчдын байр зэрэг олон барилгыг барьжээ.

Дайны дараа Улаанбаатар хотод барилга байгууламж, үйлдвэр завод, төмөр зам, цахилгаан станц, төмөр бетон гүүр, гудамж, талбай зэргийг шинээр барьж байгуулсан нь “орчин цагийн социалист хот” болоход ихээхэн түлхэц үзүүлжээ. Улмаар 1954 онд “Улаанбаатар хотыг хөгжүүлэх анхны ерөнхий төлөвлөгөө” батлагдсанаар Улаанбаатар хотыг цоо шинээр барьж байгуулах ажил эхэлжээ.

##

Эндрьюсийн цаг хугацааны аяллын түүх үргэлжилсээр…

Бүүр гайхамшигтай нь бүтэн зууныг ардаа орхисон ч Монголтой, монголчуудтай холбоотой Эндрьюсийн дэлхийн адал явдалт түүх үргэлжилсээр Та бидний сөхөж буй энэ зургийн цомгоор тантай дахин мэндчилж байна.
Байгаль судлаач натуралист, аялагч, зохиолч адал явдлын баатар Рой Чапмен Эндрьюс тэртээ Монголд хөл тавьж монголчуудын амьдралын гүнд аялахдаа нэгэн ховор дурсамжийг бидэнд үлдээсэн нь тухайн үед гэрэл зургуудын хальсанд буусан Монгол орон, монголчууд бидний эртний зан заншил, эгэл жирийн бор “Монгол” амьдрал юм. Энэ зургуудын эсгий гэрүүдийн хаалгаар дамжин Та 100 жилийн өмнөх Монголд зочлон, яг л сая гудамжинд таарсан хэн нэгэнтэй адил зүс царайтай, гэнэн цайлган нэгнийг олж харах бөгөөд дэлхийд нээлт хийсэн үлэг гүрвэлийн үлгэрийн мэт түүхийн гэрч болсон өдрүүдэд хамт аялна. Түүний зурганд бууж “патиарлагдсан” тэртээх он жилийн монголчуудын дүр төрхөөс хэрхэн аж төрж, амьдарч байснаа өгүүлэх түүхийг мэдэж, тэр үеийнхэн өнөөдөр монголчууд хэрхэн амьдарч буйг Та биднээс асуух харцыг ч бас олж харна.

(Индиана Жонс Рой Чапмэн Эндрьюс Монголд: ТҮҮХ ҮРГЭЛЖИЛСЭЭР… гэрэл зургийн цомгийн өмнөх үгийн хэсгээс
Төслийн хамтрагч, “АРИГҮ” компаний ерөнхий захирал, Эндрьюсийн түүхийн үргэлжлэлийг дэмжигч Лха.Ариунбат )

“Индиана Жонс” Рой Чапмэн Эндрьюс Монголд: ТҮҮХ ҮРГЭЛЖИЛСЭЭР… гэрэл зургийн үзэсгэлэнг Улаанбаатар хотын музей 2013 оны 6-р сарын 28-аас 10 сарын 1-ийг хүртэл гаргахаар боллоо.

• Энэхүү үзэсгэлэнгийн зохион байгуулагчаар:
• Монгол Улсын Соёл, Спорт, Аялал жуулчлалын яам,
• ШУА-ын Палентологийн төв,
• Соёл урлаг хөгжүүлэх сан,
• Улаанбаатар хотын музей,
• АРИГҮ Медиа,
• “Айсуй элч” ТББ,
• “Монголын Динозавр судлалын хүрээлэн” ТББ,
• Гамма фото агентлаг ажиллаж
• АНУ-ын Байгалийн Түүхийн Музей дэмжин гаргаж байгаа билээ.

“Автомашингүй өдөр”-ийг долоо хоногийн турш тэмдэглэнэ.

2013 оны 3-р сарын 31-ний өдөр  уламжлалт  “Автомашингүй өдөр”-ийг  дөрөв дэх удаагаа зохион байгуулах гэж байна.  Энэ удаад “Автомашингүй өдөр”-ийг угтаж “3орчих хөдөлгөөний 7 хоног” өдөрлөгийг “Автомашингүйгээр цэвэр агаарт хамтдаа” гэсэн уриатайгаар 2013-оны 3-р сарын 24-өөс 29-ны өдөр хүртэл явуулахаар болсноороо онцлог юм. Энэ нь тухайн  өдрийг илүү өргөн хүрээнд хамруулж, хотын зорчих хөдөлгөөний талаарх иргэд, хувийн хэвшил, төрийн болон төрийн бус байгууллагын оролцоо, хандлагад илүүтэй анхаарал хандуулж байгаа явдал юм гэж зохион байгуулагчид үзэж байна. “Автомашингүй өдөр” ба түүнийг угтсан 7 хоногийг  ММСС-гийн Эрүүл мэндийн төслийн гэрээт байгууллага, ЗЦГ, МОХ, МЗХ, Дугуйчдын холбоо, “Монгол даатгал” компани, “Скайтел” үүрэн телефоны компани, НЗДТГ болон  харъяа агентлаг,газар, дүүргүүд  хамтран зохион байгуулж байгаа юм.

Энэ ажлын хүрээнд 24-ний Ням гарагийг  Улаанбаатар хотын музей нээлттэй хаалганы өдөр болгон иргэдэд үнэ төлбөргүй үйлчилнэ.

Дэлхийн олон улс оронд автомашингүй өдрийг уламжлал болгон тэмдэглэдэг бөгөөд энэ жилийн хувьд дэлхий нийтээрээ “Clean Air-it’s your move!” буюу “Цэвэр агаар-таны зорчих сонголт” гэсэн уриатай байна.

Тус өдрийн хүрээнд хийгдэх ажлын хөтөлбөрийг дэлгэрэнгүйгээр доорхи хүснэгтүүдээс харна уу.

“Автомашингүй өдөр”, түүнийг угтсан  7 хоногийн хөтөлбөр.

Манай оронд ирэх долоо хоногийн турш явган алхалт, хөдөлгөөнийг дэмжих өдөр зам тээврийн ослоос сэргийлэх, хөдөлгөөний соёлын өдөр, гарцаар гарах өдөр гэх мэт хөтөлбөрүүдийн хүрээнд олон үйл ажиллагааг зохион байгуулах ба дүүрэг тус бүр өөрийн заасан талбайд үйл ажиллагаа явуулна:

Чингэлтэй дүүрэг: Тусгаар тогтнолын талбайд байрлаж, Гэсэр сүмийн уулзвараас Их сургуулийн 1-р байрны уулзвар хүртэл

Сүхбаатар дүүрэг: Мэдээллийн технологийн үндэсний паркын өмнөх талбайд байрлаж, Их сургуулийн 1-р байрны уулзвараас Чингис зочид буудлын уулзвар хүртэл

Баянзүрх дүүрэг: Бөхийн өргөөний өмнөх талбайд байрлаж, Зүүн 4 замаас Боловсролын их сургуулийн уулзвар хүртэл

Сонгинохайрхан дүүрэг: Номин их дэлгүүрийн өмнөх талбайд байрлаж, Боловсролын их сургуулийн уулзвараас Номин их дэлгүүр хүртэл

Баянгол дүүрэг: Улаанбаатар их дэлгүүрийн өмнөх талбайд байрлаж, Баруун 4 замаас Номин их дэлгүүр хүртэл

Хан-Уул дүүрэг: Драмын театрын урд талд байрлаж, Сөүлийн гудамжинд тус тус зохион байгуулагдана.

Нийслэлийн хувьд автомашингүй өдрийг илүү өргөн хүрээнд зохион байгуулж, хотын зорчих хөдөлгөөний талаарх иргэд, хувийн хэвшил, төрийн болон төрийн бус байгууллагын оролцоо, хандлагад илүүтэй анхаарч байгаа гэнэ. Машингүй өдрөөр Энхтайвны өргөн чөлөө буюу Зүүн дөрвөн замаас Баруун дөрвөн зам, Бага тойруугийн хувьсгалчдын өргөн чөлөө-Залуучуудын өргөн чөлөөнөөс дотогш 10-17.00 цагийн автомашинаар зорчихыг хязгаарлах ажээ.

Энэ өдөр автозамын хөдөлгөөн хязгаарлагдсан бүсэд “Эмнэлгийн анхны болон амилуулах суурь тусламж үзүүлэх” сургалт, өсвөр насны хүүхдүүдийн дунд талбайн зургийн уралдаан, оюутнуудын дунд хөгжөөнт тоглоом, жагсаал зохион байгуулж, задгай “Кафе”-аар үйлчилнэ. Мөн Сүхбаатарын талбайд 12.00-14.00  хүртэл  урлагийн тоглолт, 1000 дугуйн парад, гоёмсог дугуй шалгаруулах  болон нийтийн гүйлтийн тэмцээн, унадаг дугуйн уралдаан, “Ухаалаг зорчилт” байгууллага шалгаруулах өдөрлөг болох юм.

Дилав хутагт Б.Жамсранжавын лагшин мэндэлж, мэлмий гийсэн 129 насны ойн өдөрт зориулан дараахь арга хэмжээ зохион байгуулагдах гэж байна.

2012 оны 10-р сарын 08-ны өдөр

• 10 цагт: Мамба дацан хийдэд Дилав хутагт Б.Жамсранжавт зориулсан Цогчин хурал
• 11.30 цагт: Улаанбаатар хотын музейд үзэсгэлэнгийн нээлт

Монголын Үндэсний Олон Нийтийн Телевизийн 45 жилийн хүрээнд зохион байгуулж буй МҮОНТ-ийн ууган кино зураглаач Чойжилын Баяраагийн “Дурсамж 45” гэрэл зургийн үзэсгэлэн 2012.09.25-ны 11.00 цагт тус музей дээр нээлтээ хийх гэж байна.

Уучлаарай. Манай вэбсайт техникийн алдааны улмаас түр ажиллахгүй байсан бөгөөд өмнө оруулсан мэдээллүүд байхгүй болсон тул шинээр оруулж байна. Мэдээллүүдээ хоёр долоо хоногийн дотор оруулж дуусах болно.